తెలంగాణ రాష్ట్రంలోని నిజామాబాద్‌ జిల్లాలో ఘోర రోడ్డు ప్రమాదం జరిగింది. జిల్లాలోని బాల్కొండ సమీపంలోని ఈ ఘటన చోటుచేసుకుంది.
జాతీయ రహదారి 44పై ఈరోజు తెల్లవారుజామున మూడు లారీలు ఢీకొన్న ఘటనలో ఒకరు మృతిచెందారు.
ఆదిలాబాద్‌ నుంచి హైదరాబాద్‌ వైపు వెళ్లే రెండు లారీలు ఒకదాన్ని ఒకటి ఓవర్ టేక్ చేసే క్రమంలో ఢీకొన్నాయి.
ఆ తర్వాత మరో కంటైనర్‌ వేగంగా వచ్చి ప్రమాదానికి గురైన లారీని బలంగా ఢీకొంది. ఈ ఘటనలో కంటైనర్‌ డ్రైవర్ క్యాబిన్‌లో ఇరుక్కుపోయాడు.
సమాచారం అందుకున్న పోలీసులు ఘటనాస్థలానికి చేరుకున్నారు. అతడిని బయటికి తీసేందుకు పోలీసులు శ్రమించినా ఫలితం లేక పోయింది.
కొద్ది సేపటికి కంటైనర్‌ డ్రైవర్ వాహనంలోనే మృతిచెందాడు. ఈ మేరకు పోలీసులు కేసు నమోదు చేసుకొని దర్యాప్తు చేస్తున్నారు.
