డిజిటల్ చెల్లింపుల సంస్థ ఫోన్ పే తన ఉద్యోగులకు బంపర్ ఆఫర్ ప్రకటించింది. వారిలో మరింత ఉత్సాహం నింపేందుకు ఒక్కొక్కరికి రూ.3 లక్షల విలువైన షేర్లను బదలాయించింది.
కంపెనీలోని అన్ని స్థాయుల్లో ఉన్న 2,200 మంది ఉద్యోగులకు వర్తించేలా ఈ నిర్ణయం తీసుకుంది. అందుకోసం రూ.1,500 కోట్లను విలువైన షేర్లను ఉద్యోగులకు బదలాయించింది.
గతేడాది డిసెంబరులో ఫ్లిప్ కార్ట్ నుంచి విడిపోయి స్వతంత్ర సంస్థగా అవతరించైనా ఫోన్ పే ఈ కీలక నిర్ణయం తీసుకొంది. తాజా షేర్ల బదలాయింపుతో ఉద్యోగులను కూడా యాజమాన్యంలో భాగస్వాములను చేసినట్టయింది. ఈ మేరకు ఫోన్ పే వర్గాలు ప్రకటన చేశాయి. ఉద్యోగులు భవిష్యత్తులో లాభసాటి అనిపించినప్పుడు ఈ షేర్లను అమ్ముకునే అవకాశముంటుంది.
ఈ నేపథ్యంలో ఫోన్ పే సహవ్యవస్థాపకుడు, సీఈవో సమీర్ నిగమ్ ట్విట్టర్ లో స్పందించారు. ఫోన్ పే వ్యవస్థాపకులుగా రాహుల్ చారి, నేను అద్భుతమైన భావోద్వేగాలకు గురవుతున్నామని పేర్కొన్నారు. సంపదను పంచుకోవడంతో మాలో ఆనందం వెల్లువిరుస్తోందని వెల్లడించారు.
